شيخة الحور وقمرهن

بيضهن وأحلى سمرهن

وأجمل أجمل من عرفت من العذارى

وأكمل أكمل من مشت بين العذارى

والمحال الممكن والصعب والسهل

البعيد اللي وصل

وشهقة الشعر وزفيره

والأخيرة

* * *

ريّحيني من أبوزيد الهلالي

والملوّح قيس

اقلبي التاريخ في عيوني تعالي

واشرقي بلقيس

وامنحيني في الشهر حصة غرام

درّسيني في مجازات الكلام

علّميني الفرق

بين المبتدا.. وبين الختام

عافوا الطلاب جهلي وفكري المسكون حيره

وعفت أنا التدريس والحصة الأخيره

* * *

كل مهنه غير حبك يا بعد عمري سخيفه

اتركيني فيك أهيم

واتركي نبضي بكيفه

رزقتي شوفة عيونك

والهيام اروع وطيفة!!

لا تلفّيني بسكون ولا تذلّيني بصمتك

غرّدي يالعنبوها خفقة ماصهللت لك

انحري رقاب الأماني والظنون

صبّحي عيد الجنون..

وفجّري بين العواذل حسرةٍ تعمي العيون

خبريهم من تكوني.. خبريهم من أكون

ولا تهابين السيوف اللي من الغيره مغيره

دام باقي للأمل فرصة أخيرة

* * *

كنك المنوه هملتي

في مرابيعٍ خليّه

بك تجدّد روضي الذابل وشال السامريه

ان طلبتك حلم صرتي..

وان بغيتك واقعيه

بالصحاري ريم عفرا

وبالشواطيء ساحليه

عشتك بكل الحضاره وكل ذيك الجاهليه

في ليالي الصخب كنتي وبالليالي الشاعرية

يابنيه.. يافضا العاشق وطيره

مانسيتك واذكر القصة الأخيرة

* * *

ماعرفت إني ظلالك قبل أعْرفك

مابقت فيني خليّه ما تعرفك

ابتهاجاتي تعرفك

انفعالاتي تعرفك

انكساراتي وذاتي واتجاهاتي تعرفك

ساعتي عطري مفاتيحي وحاجاتي تعرفك

وكل من كان وعرفت وصار يعرفني يعرفك

ومن سمع عنِّي قصيدة لو قصيرة

ومن سمع أول قصيدة

ومن سمع هذي الأخيرة

* * *

طال عمرك أو قصر.. ماهمّني

مادمت أنا عمرك

مادمت أنا أمرك

مادام قلبي لك مكان..

مادام نبضي لك زمان..

مادام شعري جلستك ودلالك وتمرك..

ومادمتي في عرشي الأميرة..

كل عام وإنتي بخير

وكل عام وإنتي الأخيرة

** **

- د. صالح الشادي