الموضوعات الأكثر
هذه مشاعر نثرتها كحروف على قبر والدي الشيخ سعد بن عبد الله العجلان، رحمه الله وأسكنه فسيح جناته..
البارحه ما سرى ليلي على هونه
عيني قزت عن منامي بانتباهتها
كني صويب(ن) يساهر دامي طعونه
والعين ما وقفت عن هل دمعتها
النفس مهمومة(ن) والروح محزونه
والفكر منقاد طابع في معيتها
يعصرني الحزن عصر الكف ليمونه
ويلعب بي الهم لعب الناس كورتها
يااللي تسل عن بعيد الدار وشلونه
تنبيك عما خفى بالنفس زفرتها
عليك يااللي تركنا واقفت ضعونه
الروح تشكي لهايبها وحرتها
يامن عليه يمون وفيه لي مونه
وين أنت يا زينة الدنيا وبهجتها
تبكي عيوني ووجهي شاحب(ن) لونه
ومشاعري بين لوعتها وحرتها
ما يجرح القلب غير فراق مضنونه
ورمح المنيه وميسمها وكيتها
الموت لو وقفت حمر القنا دونه
كان الزحازيح ما حلت منيتها
لكنه الحق لو هم ما يشوفونه
لا بد للنفس من تالي نهايتها
درب(ن) جميع الخلايق بيمرونه
ناس(ن) مضت تنتظر ناس(ن) بساقتها
ما أحد(ن) له الخلد غير الله في كونه
في قبضته تنتهي الدنيا برمتها
ليت المنيه وهي يابوي منسونه
تأخرت وأبعدت ميعاد جيتها
أرواحنا للمنايا تقل مرهونه
ورهانها ينتهي في وقت حزتها
دنياك هذي ترى ما هيب مامونه
لا تنخدع في مغانيها ولذتها
ياالله يااللي جميع الخلق يرجونه
ياخالق النفس يا عالم سريرتها
يا من يكفيه بأمره كافه ونونه
أسألك تغفر خطاياها وزلتها
** **
- الشاعر/ محمد بن سعد العجلان