أنا ويش أسوي في زمانى يابن نمّاس

زمانٍ مغامر والثقة فيه تخدعني

يحاول يوقفني على شفةٍ من ياس

وعيت دروبٍ تاسع الناس تاسعني

أخذ بي على درب الشقا والعنا مرواس

ولاباقي إلا في المهامه يضيعني

تحملت من جور الليالي بدون قياس

ولو حملها ميّل على المتن وأوجعني

وصبرٍ على الشدة شجاعة وقوه باس

لكنّ الظروف القاسية ماتطاوعني

ليا اجتمعت الثنتين حاجة وشيمة راس

وهذي تنزلني وهذيك ترفعني

رفعت النظر والله عطاني نظر واحساس

وهي ميزةٍ في كل الأحوال تنفعني

ولو كان بين الصّم والبكم لي مجلاس

هذا ما يكلمني والآخر ما يسمعني

حياة التجارب علمتني وأنا حساس

وخلتني اعرف نظرة العين وش تعني

وأنا لو بدت لي حاجةٍ عند بعض ناس

أريد الكلام وعزة النفس تمنعني

** **

- رشيد الزلامي