يوم طاب السهر عيّت تطيب النفوس

جت من الله وأنا كم كنت محتاجها

كنّها من حلاها كل ليله عروس

خايفه من عيون الناس واحراجها

حي هالطول يازولٍ عساه امحروس

من عبث لوعة الأيام وازعاجها

تزعل نفوس والاّ تمتلي غيض عروس

من يقرّب لها وضوعي سياجها

لي متى وانت ياشوق القلوب امحبوس

طالت السالفه وابطيت بعلاجها

جعل قلبٍ على نار الغياب محموس

يحترق بين صاليها ووهّاجها

من خبر له غلا بين الضلوع مغروس

غرسةٍ كل ابو شعري من إنتاجها

لا تقرّب لك الفرقا هذيك الهجوس

من متى والبحور تفارق أمواجها

لازم أصر على وجه الزمان العبوس

لين سود الليالي يضحك احجاجها

من بغى يقطع الفرجه يعاف الجلوس

لين ياصل نهايتها ومخراجها

كان شعري قصر ماطال شمس الشموس

تستريح القصايد داخل ادراجها

** **

- متعب التركي