يا طارف الصحب عندي علم غير العلوم

تعال ودّي أفضفض لك وأعلمك به

ملزوم أعلمك يوم إنك تسدّ اللزوم

علمي بعد ضاقت الأريا ما عاد أقضبه

حاولت أشد العزوم ولا بقالي عزوم

وحزامي المرتخي عجزت يدي تكربه

منجوم لو أهتدي بمسيرات النجوم

فعيوني الربع والأعداء نفس الشبه

ما فيه شيء ابتهج به في حياتي يدوم

إليا ابتهجت بوجه درب الذهاب أذهبه

وإن هبّت بريحه الأمطار دهم الغيوم

فأطرافها الخير لكن وسطها الأتربه

نزحت عن وافعي وأنحيت يمّ الحلوم

وعايشت الأحلام قبل أصحى وقبل أنتبه

خذيت من لونها الوردي كبار القسوم

وياللأسف جت جميع قسومها مرعبه

كتمت فالصدر لين أزرت ضلوع الكتوم

صبر، صبر وانقضى صبره وضاق إرحبه

وش قولتك لا أستجن الوقت والربع قوم

تقفي عن القوم والا تنطح المِنشبه

إن قلت لأجل الكرام أدمح خطاة الرخوم

أقول حمل الكريم اليوم حمل رقبه

اليا حكيت الصراحة قام كلٍ يلوم

يعني عشان السلامة كل كذبك جبه

إليا سبحت البحر قالوا عسى ما يعوم

وإليا صعدت الدرج زادو عليك إعتَبَه

حتى لو تطير عنهم فوق تعجز تحوم

تجيك حذفة لسانٍ موجعه معطبه

ندفع بالأحسن ولكن ما سلمنا الهجوم

إلى متى والحليم يغّط صوت غضبه

في تالي الوقت تلقى شخص دون العموم

يكفيك جملة عربك إليا سَلَم مذهبه

وإلا أكثر الخلق ما تقدر تسد اللزوم

لو عدّها الرجل من روحه ومثل عربه

والتاليه علّها بحمول أهلها تقوم

لين يحصل خير وإلاّ الجاي أعلمك به

** **

- مرزوق الروقي