فكّرت بالوقت وهجوسي رحاها تدور

وعيّنت بالناس حاسدها وختّالها

اقبلت كلّي وفاء ووجيه الأصحاب بور

وبعض الأصاحيب فال الله ولا فالها

من وين أبلقى رفيقٍ بالقسى له حضور

وقليل من يحتمي كلمته لا قالها

إن كان غرّبت من خوّة طوال الشبور

تراك في حالةٍ صعبه ويرثى لها

الرجل ودّك على العلياء طموح وجسور

وان ما تهيّت على شفّه تهيا لها

عينك على كل ما يرفعك في كل دور

ترى الرجاجيل تعرفها من أفعالها

ولا كل من يبتسم لك صادق بالشعور

أحيان من يعشق الحيلات يحتالها

ما بين أول ظهور وبين آخر ظهور

تشوف ما يخلف العقّال وأحوالها

لو كان بالعين نكشف ما تكن الصدور

كان أكثر الناس ما عاشت مع عيالها

غير الذهب كل عمله لو وفت لك تبور

يطيح عنها القناع وينكشف حالها

أهل الوفا والمروّه في بطون القبور

ودروبهم مع جبالٍ صعب محوالها

والآدمي ضيف والدنيا محطة عبور

يسعى عليها وموت النفس يسعى لها

الناس مفتونةٍ فيها وتبني قصور

مقفين عنها وطعمتهم على اقبالها

وأصحاب الألباب ما تخفى عليها الأمور

تعيش لكن نهايتها تورّا لها

وين أفضل الخلق وأصحابه وكل العصور

اللِّي خلت ما نفعها طيب منزالها

لو كان فيها يدوم العمر بسط وسرور

ولا فيه فرحه صروف الوقت تغتالها

ما قال عنها مكوّنها متاع الغرور

يا مخبل اللِّي عليها تبني آمالها

** **

- نهار بن ممدوح