الموضوعات الأكثر
«الجزيرة» - عبدالعزيز بن سعود المتعب:
الشعر الشعبي الوطني هو موثق الوفاء والولاء واللحمة الوطنية ووحدة الصف تحت راية العز والسؤدد الخضراء الخفاقة -لا إله إلا الله محمد رسول الله- والقصيدة التالية تُجسد كل ذلك وتتغنَّى بالأمن والأمان ومنجزات الوطن المتلاحقة في عهد سيدي خادم الحرمين الشريفين الملك سلمان بن عبدالعزيز - أطال الله عمره وأدام عزه -، وسيدي ولي العهد الأمين الأمير محمد بن سلمان بن عبدالعزيز -أطال الله عمره وأدام عزه-:
من عيون الشعر بأوراقي عيون
سلسبيلٍ يروي الحرف ويزين
وازهرت باسم الوطن خضر الغصون
والهبوب أربع جهاته ياسمين
للوطن فيها تعابير وشجون
وأغنيات الود بالحبل المتين
ياوطن سْكِنْك في آمن وسكون
وأنت تسكن كل قلب وكل عين
الليالي في سماك بكل لون
دايماً تزدان بالثوب الحسين
كل يوم بشوتنا فوق المتون
ونتغنّى فيك يالكنز الثمين
لابسٍ ثوب الفرح مثل المزون
والبروق السيف بالكف اليمين
والطمأنينه على هيبتك كون
في أمان الله وجوده تستعين
شامخٍ في عزّتك عن كل دون
صوتك الحكمه من العقل الفطين
حارسك ربي من أفكار العفون
في ذرى سلمان في حرز مكين
فيك جاوز كل صعبٍ مايهون
لين بافعاله تجاوزنا السنين
فيه عطف ولطف من قلبٍ حنون
وفيه عزم وحزم والقاسي يلين
وفيه عرفٍ فارقٍ بين الظنون
كل ميزه حزة الموقف تبين
دايماً صوته لشعبه وش تبون؟
ابشروا فيما تبون وحاضرين
وابشر أنك بعد حفظ الله مصون
من ولي العهد بالعهد الأمين
ياوطن هذا قدرك أنك تكون
قلب يستوعب جميع المسلمين
أنت للمحتاج والمضيوم عون
يستعينك كل ما قل المعين
يا وطن في نور دربك يهتدون
يوم نهجك منهج الحق المبين
يا وطن شفهم بحدّك يكتبون
مجد متجدد يسر الناظرين
الأسود اللي تسود ولا تخون
السلاح ارواحهم عزم ويقين
بيعة الأرواح من دونك تهون
عادةٍ نفخر بها دنيا ودين
ما تطولك كل نزعات الجنون
في عقول الحاقدين العابثين
كل ما قاموا يحدون السنون
عندنا لارقابهم حدٍ سنين
ان تبيّنا عليهم يختفون
يوم شافوا غيضنا ما يستكين
حالهم من دون حتى ينفدون
وانت دونك يا وطن حصنٍ حصين
انت لك با رقابنا جملة ديون
كل يوم تزود وتسر المدين
يا وطن شعبك على الشده زبون
ما تعذر منك بالعذر السمين
نم قرير العين في كل العيون
يوم تسكن كل قلب وكل عين
** **
ضيدان المريخي