الموضوعات الأكثر
يا صاحبي لاعاد تنشد عن الحال
نشدتك عن حالي تزود جروحي
لاصار مافي يدك تعديل الاحول
مالك ومال هموم قلبٍ ينوحي
انا لي ايامٍ طويلات وليال
ادفن جميع جروح روحي بروحي
الوقت ناره بالحشا تشعل اشعال
والحظ لايبصر ولاهوب يوحي
العام ضاق الصدرواليوم لازال
همي يساقيني غبوق وصبوحي
قد قلت لك قدامي دروبٍ طوال
وساقٍ على قطع الفيافي شفوحي
كانت لي احلامٍ عريضات وامال
يوم ان براق السعادة يلوحي
ياما ضربت بواقعي نايف الجال
ويامابنيت من الاماني صروحي
وياما رفعت لبعض الازوال تمثال
وياما لاجل غالي حشمت النبوحي
واليوم يوم الوقت ياصاحبي مال
ياقرب هوماتي وياقصر شوحي
العمر راح وسود الافكار تجتال
تقبل بها هوج الرياح وتروحي
قل الجهد من كثر طرد اشهب اللال
ونفسي بعد عافت وقصرت شبوحي
دام الخيال هبال والواقع هبال
وش فايدة ركضٍ قليل الربوحي
** **
- عبدالرحمن العريفي