يا ليت كلمة سم كل يوم تنقال

وياليت كلمة لا نحذر نقوله

ويا ليت كلمة روح في كل الأحوال

تستبدل بكلمة تعال امحفوله

ويا ليت وجه الخير في يومنا فال

ويا ليت وجه الشر ندفن أصوله

ويا ليت كل الناس أنثى ورجَّال

كلٍ يقدِّر صاحبه ما يطوله

ويا ليت باب الحقد مقفول باقفال

ويظل باب الخير ملفاء ودوله

وإن كان في نفسك من الهم مثقال

ترى كثير الناس زادت حموله

خل الوفاء شيمه وطبعٍ وموَّال

وينحل كل الصعب لين وسهوله

الحظ ينسى ناس وعن ناس ميَّال

كلٍ له المكتوب والاَّ فلوله

ترى بعض هالناس ماعندهم مال

ومن الفقر ما عندهم فص فوله

يفرح إلى جيته بحلٍ وترحال

لو ما لقى يطعمك ينحر ذلوله

ما يسألون أحدٍ ولو ضاقت الحال

من بين كل الناس يبي الرجوله

يا خوي ترى الإنسان راحل ورحَّال

خلّك كريم الطبع راعي بطوله

يا خوي أنا بنصحك لا تكون عذَّال

اعرف ترى محسوب كل ما تقوله

ابعد عن الأحقاد والقيل والقال

ترى الحقود اليوم ظلمٍ وصوله

أوصيك بالأولاد والعم والخال

ترى الرحم ديمٍ ومسكٍ هلوله

أمك هي المغنم هي الراس والمال

الجنة تحت أقدامها مع ظلوله

والوالد اللي يفتخر فيك رَجّال

بين البشر من بد كل الحموله

إمَّا تقدرهم لك النار منزال

نفسك وعالجها تراها امعلوله

ويا أختي أنا بوصيك من كل محتال

عليك بالقرآن هدي ودلوله

صَلِّي صلاة الفرض والشفع لو طال

ترى الوتر بالليل خير ومنوله

أوصيك بالإحسان والبعد عن ضال

يشهد علينا كل فعلٍ وقوله

مدِّي يدين الخير والبر وأفعال

وياويل من منهو يديه امغلوله

يا رب ياللِّي ترزق الطير لاجال

ما ترع إلا شابعه من سهوله

ويارب يوم العرض شيوخ وأنجال

تمحى الذنوب اللِّي عليهم مهوله

وارحم لي الوالدين من هم أوصال

واسكنهم الفردوس قصرٍ ودوله

وارحم رفيقة عمر يضرب بها أمثال

الغالية أم الكرام الوصوله

ويارب يارحمن يا عارف الحال

ترفق بعبدٍ يرتجيك وتؤوله

ويارب للفردوس بابٍ ومدخال

أنت الغفور اللِّي تبارك سيوله

أدعيك يا منَّان وآمالي آمال

تحرِّم علي النار ما اصير حوله

في صحبة المختار وطه والأنفال

ومن كوثره أشرب ولو ربع توله

** **

- د. سالم بن محمد المالك