الشعر عرّض تالي عصير نوّه

يبرق ويرعد والهواجيس حيّه

وشرد القوافي بالطواري تموّه

وسيفي بديع الشذره الابجديّه

والبحر الاحمر بالسياحه ينوّه

وبحر الخليج يلاحي السامريّه

واحب دين الله واجنّب غلوّه

وعند الله المعبود رزق البريّه

وارجي رضى ربي واعادي عدوّه

والله يكفينا خطا كل سيّه

وبين الوطن وازحول الامجاد خوّه

وبيعة ولي العهد تاجب عليّه

قوّه يامير العُرْب يامير قوّه

على كتاب الله وسنة نبيّه

محمد بن سلمان راع المروّه

قرمٍ فرق بالشيمه اليعربيّه

حرٍ يسارج بالمواجيب ضوّه

النادر الهيلع زبون الونيّه

صليب راي ويقدح الراي توّه

واعزوم قلبه بالمواقف قويّه

واعتوّة عقاب النوايف عتوّه

حطم حلوم الزمره الفارسيّه

وفي دم قلبه دون الاقصى حموٌه

ومكه وطيبه والبلاد الزكيّه

وشبه الجزيره تفتخر مع سموّه

وتكحلت بالدعوّه الواهبيّه

دارٍ علمها ماينكّس اعلوّه

وشيخ المذاهب مذهب الحنبليّه

والشعب مايصخي حقوق العنوّه

محزم ملوك الدوله الفيصليّه

قلته على منهاج شرع النبوّه

وشرع النبوّه ينبذ العنصريّه

واعداد نوٍّ ترزم رعود نوّه

على النبي مني سلام وتحيّه

** **

- محمد القسامي