الموضوعات الأكثر
أبكتب عن حزن يحتار بوصفه أكبر الشعار
حزن عم الرياض من أسفل الديرة لعاليها
حزن لو قلت أبكتب عنه قصيدة نثر أو أشعار
يتيه الحرف وما ألقى عباره تفيد معانيها
بغيت أكتب لقيت الشعر في وصف الحزن يحتار
وش أوصف حزن عم الكون عاليها ودانيها
حزن أدمى قلوب أهله وأحرقها بوهج النار
وهلت دمعها ومن حرها أحرق مآقيها
حزن ما ينوصف بالنثر ولا بالشعر والتكرار
مصيبة حلت وفقده فضح مكنون خافيها
مصيبة حلت بأهلي وناسي والرعب والجار
ترى والله لو أوصفها بديوان ما غطيها
مثال الطهر والعفة حبيب وسيد الأخيار
عطوف وطيبته غطت على الدنيا ومن فيها
حكيم من نصاه بضيقة سارع بفك إعسار
كريم فاض جوده وعم ناس ومقدر أحصيها
تواضع جم وأسلوب وتعامل مع كبار وصغار
وزهد باع به دنياه ولاهمته وش فيها
بكته رياضنا بدموع وصاحت من فراقه الدار
وشكت من لوعة الفرقى وعجزت إنه تخفيها
بكى الشارع على فقده بكته الدار قبل الجار
دموع هلت بفقده ويا سبحان مجريها
بكى محمد وعبدالله ويونس دمعهم مدرار
وبكى عبدالإله وأمهم باحت خوافيها
بكت زينب ونورة وريم بدمع أحرق الأنظار
وبكت بسوم وهند ولولوة بدمع أحرق مآقيها
بكى أصحابه بكى أحبابه بكاه البدو والحضار
بكى كل من عنا يعزي ودمعاته يخفيها
بكته الدار وأهل الدار ومجالس كلها زوار
بكى فقده بكى عطفه يتاما راح راعيها
قمر شمس ونجوم وطيور وكل من بالفلك دوار
تمنى رجعة الغالي لدنيا أقفى مخليها
الهي أربط على قلوب دموعه كنها أنهار
كواها البعد وأضناها لهف قلب معنيها
دعينا الله عظيم الشأن تالي الليل بالأسحار
عسى قبره رياض من جنان الله يعطيها
عساه بجنة الفردوس وبجوار النبي المختار
عسى يلقى جزاء أعمال قبل موته يخفيها
رحيم ورحمته عمت جميع الكون والأمصار
حليم لادعاه العبد كل دعوة يلبيها
صلاة الله على محمد نبي الله عدد من سار
لمكة يرتجي رحمة إله البيت وراعيها
** **
- فاطمة محمد المالك