الموضوعات الأكثر
مهدي العبار العنزي
الشعر بوح الفكر واحساس وشعور
والشعر مبداء واعتزاز ورساله
لو كنت انا ماني على الشعر مجبور
لا مااتركه منساه لا جاء مجاله
انقحه عن كل غلطات وقصور
واقدمه وابديه حين اكتماله
شعر الرثا من قلب بالحب مغمور
للي سعى للمجد والمجد ناله
رجل الوفا والخير بالخير مذكور
في سيرته في شيمته واعتداله
والعلم يوم العلم بالمجتمع نور
عزالله ان الشيخ منصور طاله
مرحوم ياشيخ الادب صايب الشور
مرحوم يارمز النقا والجماله
منصور ابن مالك وبالرب منصور
في ذمة الله يوم حل ارتحاله
عساه بالجنه ويسكن مع الحور
في جاه رب الكون جلا جلاله
اللي دروبه مابها زيف وقصور
ولا هي سلوم اهل الطغا والظلاله
محبوب متواضع وعاقل ومستور
كريم نفس ورجل حلم وبساله
كم واحدٍ جاله من الوقت معسور
ماشح في جاهه وجهده وماله
ذكره مع اهل العلم واضح ومشهور
شهرة وفا ماهيب شهرة جهاله
مخلص وله باهل الوطن والوطن دور
في خدمة الدوله ودرب الشكاله
واليا نخاه اللي من الظيم مقهور
يبذل معاريفه ويبذل حلاله
لا مدورٍ شهره ولا هو بمغرور
تعطي يمينه مادرت عن شماله
كم اسرةٍ عانت من الفقر والجور
كنه عليهم ماخذله وكاله
والتعزيه ترفع لغياب وحضور
نشمل بها اخوانه وجملة عياله
وَيَا اسرة المالك ترا العز مذخور
بوجودكم ماهي لواحد لحاله
وختامها يالله تغفر لمنصور
ويالله عسى الجنه مقره وفاله