ياعين حرٍ على مركاب

سبوق المحابيل جاذبته

صافي عمد اقطمٍ جذّاب

لافرّع، بريقعه، هبته

يدعيه راعيه ياكسّاب

عرض المناكب معذربته

يقول شبكته من المرقاب

لجل الملابيد، دربته

ياصاحبي ماعليك عتاب

لا اشقيت قلبي وعذبته

جرحي من العام ماقد طاب

جروحك شلون طببته؟

من الحيا عضّة العنّاب

بضوح البرد ليلي قلبته

والخد لون الشفق بغياب

مالوم قلبي لو نهبته

اسهر وكني قريص الداب

ارقط ظهر يبرم رقبته

اذا وقب غاسقه ينساب

وعروقي السم شاربته

انا جريح الهوى منصاب

هو صابني مير ماصبته

اجيه متشرّه، وطلاّب

واعود؟! والحق ماجبته

** **

- نايف العبيد