الليلة ياليل الشتاء ليلة فراق

منها امتلأ وجه الوصل حزن وهموم

وضلوع صدري هزّها موت الأشواق

وذابت شموع الود والقلب مصدوم

ما بين برد الجو واجروح الأعماق

نار وحروب وباقي أشلاء مهزوم

وملامحي ما بين عتمه ومشراق

وكلام لا واضح ولاهوب مفهوم

وأحلام ماتت والوجع داخلي فاق

وقلبي من أول حيل ضايق ومكتوم

وأحزاني اللي أحرقت جوفي إحراق

ما عاد يطفيها معاتب ولا لوم

ليل الشتاء ميعاد أحباب وعناق

ما يسهره منهو من الحب محروم

بالله ياليل الشتاء عطني طراق

وبالله صحوني على الصدر جاثوم

ياشينها بعد السعه ضيق الأخلاق

يا قطع كبد اللِّي يبي لذّة النوم

أسدل ستارك ماتت جفوني إرهاق

هذي النهايه حزن وفراق وهموم

** **

- مداهيل