أكيد إنّك على غفله نسيت وجبت لي سيره

أو إنّي ما عرفت أعلّمك وشلون تنساني

كثر ما كنت أشوف إن المفارق ضيقه وحيره

كثر ما كنت أحس إنك ولهت وجاك ما جاني

أعرف الحب الأول ما يموت وما يجي غيره

وأعرفك كل ما يطري عليك القرب تلقاني

أجل ما قلت لك ساعه معك تسوى لها ديره

علامك تزرع الغيبه قصيد وتحصد أحزاني

تغيب وما تبيني أطوي الدرب ومشاويره

وأنا لولاك ما كان القصيد يحرِّك أشجاني

إذا ما كل شاعر يكتب إلهامه وتفكيره

تعال اكتبني في دفتر حياتك واعزف ألحاني

حبيبي والطعون اللي تجي من خنجرك خيره

لأن الجرح يأخذ هيبته من هيبة الجاني

تعبت وكل ذنب بغيبتك ماتت معاذيره

مثل ما كنت مسرف بالعطاية وأنت حرماني

لو إنك تفهم إحساس الغلا وشلون تأثيره

فهمت شلون ما شوفك وأجيب اسمك على لساني

تصدق عادانا والشوق والإحساس والغيره

جلسنا كل واحد يشكي غيابك على الثاني

** **

- عطالله فرحان العنزي