الموضوعات الأكثر
المملكة فخر العرب طول الأعوام
درعٍ للأمة في جميع الميادين
يدوم عزك كل عامٍ بعد عام
يا مهبط القران يا منبع الدين
عبدالعزيز اللي بنى الدار ما نام
ألين نوّم كل روس الشياطين
عبدالعزيز موحد المملكة قام
بالدين والتوحيد نصر الضعيفين
أبو اليتامى ناصرٍ لأم الأيتام
اللي دعت له مع عموم المساكين
ليث الجزيرة بالمهمات ضرغام
قاد الرجال اللي على العسر واللين
عدوهم من ضربة الليث ماقام
صاطين لاجل الحق والدين صاطين
ثم أذن المذن يقول السعد قام
فرحوا جميع الناس خص المسنين
تباشروا به باليمن واخر الشام
وارض الكنانة والعرب في فلسطين
كانت فلول الشرك خلفه وقدام
يوم انتهض استسلموا له مطيعين
حكم بهم حكم الشريعة ولا ضام
العدل هو والدين حكم المصلين
قاد البلاد لقمة المجد قدام
وحّد شتات البدو واللي مقيمين
شامت لأبوتركي وعن غيرها شام
تزيّنت له كنها بنت عشرين
قالت بجاه اللي له الخلق صيّام
ماغير ابوتركي يشد الرسن زين
قام وتلوى بشعفتها ولا نام
ألين صارت عشر الاحباب عشرين
طاعت وطوعها على كيف ما رام
صارت مطيعة وين ما قالها وين
ألين صار الذيب يسرح بالاغنام
كلٍ عرف حده على الحق ماشين
شيخ على شعبه كما الغيث عمام
ألين كلٍ بدل الشين بالزين
خلّف رجالٍ فاهمين بالاحكام
صلبين الاريا حزة العسر واللين
قاموا بواجبهم كما الشيخ ما قام
عز الله انه رحمة للمسلمين
في عهدنا الزاهر تقل نحلم احلام
العقل ماصدق ولو شافت العين
في عهد سلمان الحزم كبرت أرقام
تطورٍ مذهل بكل الميادين
ما أظن بالعالم مثل عندنا قام
أكيد لا ماصار بالغرب والصين
ياخادم البيتين حققت الاحلام
اللي نفكر به تحقق بضعفين
ولى عهد المملكة كل ما حام
يمناه تغنى كل من ضده الدَين
عضيد ابوه وكل ما شاوره قام
له ضربة تاقع على الخشم والعين
صلاة ربي عد من نام ثم قام
واعداد من طافوا بمكة ملبين
** **
- عبدالله بن علي بن خليف الهويشان