الموضوعات الأكثر
هب الحنين وقلت اسلي الروح لين
فك الدموع من الوله.. سجانها
ذكرتها وانا حفيد الذاكرين
اللي ما ربونا على نسيانها
ما مرت ببالي مرور الأكرمين
انا الكريم اللي مروره صانها
الطاهرة مهد الرجال الطاهرين
يعظم الله.. من يعظم شانها
نشعب لها ركاب الموده والحنين
ونسوق غاليت الثمن ل اعيانها
ونجود باغلا ما نجود من السنين
وحنا ليا جات العجاف سمانها
يا ما تضم ببطنها من الخالدين
ويا ما ظهرها شال من حيانها
الله حباها الانبياء والصالحين
شجرة نبوة وارفات اغصانها
واختارها الله للنبي الهادي الامين
يوم اصطفاها بـ كعبته واركانها
والله جعلها قبلةٍ.. للمسلمين
وانعم عليها ب أمنها وامانها
بدد بها ظلمة ملايين السنين
والكون نوره شعشع من اوطانها
ساروا به اصحاب النبي والتابعين
من أرضنا اللي دونها فرسانها
ايه ارضنا رحم الرجال الفاتحين
من خلد التاريخ فعل ايمانها
ارض الوحي ومهد خير المرسلين
من مكة وطيبة بزغ قرآنها
ويوم الله ابدلها بثوب العابثين
واضحت من الفوضى ذليلن شانها
ولى عليها ال السعود الظافرين
حكام نجد اللي زهت.. تيجانها
استبسلوا من دونها بالصاملين
جداننا درع السعود وزانها
من حكموا شرع الله ال محمدين
الين اخو نورة مسك بعنانها
عبدالعزيز الفيصلي طلق الجبين
سلطانها لا قيل من سلطانها
جاها وهي حرة وهو عذره سمين
وعيت عليه الين مس بطانها
ووحد شتات العابدين الزاهدين
وطهر ثراها من بغي عدوانها
وصارت على ايدينه ملاذ الخايفين
ومنصى العباد اللي تصون ايمانها
ومن بعده عياله تولوها يا لين
صار اكثر العالم رهين احسانها
تعطي وتنفق والعطاء منها يبين
ولا سكرت في وجه احد بيبانها
والحرب لا جت يدركون العارفين
الدار هذي راجحن ميزانها
الله يحفظ ترابها من الطامعين
ويصونها غصب على من خانها
ويحفظ لها سلمان عوق المعتدين
ويحفظ لها محمد ولي سلمانها
** **
- عبد الرحمن الوزان