آخر ما كتبه سعد الخريجي قصيدة حزينة عن طعنة صديق العمر:

لا يا صديق العمر أنا منك مصدوم

صدمه كبيره جابت أكبر إصابه

طعن الظهر يا صاحبي شر محتوم

يهديك ربي كيف قلبك رضى به

تسقي صديقك بالغدر كاس مسموم

لا واسفا بالطيب لا واسفابه

هذا جزا اللي حط في كتفك نجوم

تضحك بوجهه وتصلخه في غيابه

لا شفت قو البرد لبستك هدوم

البرد ما يرحم رهيف الثيابه

لا اشتد حر القيظ ما صرت مضيوم

أقف لكم مثل الأثل عن ترابه

لو أحكي القصه غدا الكون مهموم

وعمت لغات الأرض حزن وكآبه

ولو اسرد القصة على محارب اليوم

نسى الحروب الطاحنه والتهى به

ما أبيك تشبه بالنخل نخلة الدوم

منظر ولا تثمر ولا له مهابه

جذر الأثل يمتد في الأرض ويدوم

تسقيه مره ويكتفي عن شرابه

اللي منعني عنك اسكت عن اللوم

ثنتين في دمي عطوني الذرابه

طيبة حضر فيها الوفاء شي معلوم

وشيمة بدو لاهل المواقف طرابه

** **

- سعد الخريجي