لاَ سَلَّمْ الله يمينٍ مِنْك صادَتْني

يا مدمي الهامة اللي عَنْك مرفوعة

أعياك راسي وطاوَلْ للسما مَتْني

وانت اسكنَتْك الدنايا جحْر يربوعه

ماني بمثلك سحابي ما يجي هَتْني

أنا ترى وابلٍ جَرّتْه مَتْبوعه

وان كان الانذال عابَتْني وْسَبَّتْني

الوَرْد يغري دبيب القاع في ضَوْعه

أنعمني الله عليك ورام بك فَتْني

والتِبْر بالنار يُجلى للبشَر نوعه

دِنْيَاً على غير مشهاتي تولّتني

وانا على السِّلْم الاوَّلْ واتْبَعْ سْنوعه

كم نوّخَتْ بي على اللوعة وْخَلّتْني

أظما وعن جَمّها رِجْلَيّ مَمْنوعة

فيها كما الوَرْق للأغصان حَدَّتْني

يبكي وهو يطرِبْ المشتاق بِسْجوعه

وانا على الشوك من مبداي مَشَّتْني

ولا هي بتصفى وعمري يَطْوي شْروعه

للقاف من غِمْدها الموجوع سَلّتني

لين انثنيت لْحَشاي آدوزِنْ وْجوعه

كم وَقّفتني على الأطلال وابْكَتْني

على رجا فَجْرها اللي مبطي طْلوعه

آشِبّ ناري على النايف وْشَبّتني

بالله وش حَيّ تصلي جوفه ضْلوعه

خَلَّيت ما لي حبيب خْطاه لَبَّتْني

والريح تدوي وطنْب البيت مَشْلوعة

وشلون كَفٍ روَتْ جالي وْلَمَّتْني

رَدَّتْ على الروض الاخضر تَحْرِقْ زْروعه

والناس هذا شفوق وذاك يبهتني

والسوّ له كلمةٍ بالناس مسموعة

أقفت ركاب المودّة ما تحَرّتني

لين أشْهَبْ اللال جَز الرَّكْب وِمْتوعه

ما بين يَمْنَيً سطَتْ وِشْمال لَفّتني

حب انطوى بالعذاب وْبَادَتْ شْموعه

** **

- عيدة الجهني