يا كريم الوجه والجاه يا رب العباد

معتلي بالكون شانك ولالك من شريك

كل طاغوت تغطرس تحت قدرتك باد

منقذ من لاذ بك يامجير اتعس دريك

يالله اني طالب منك تحقيق المراد

رحمتك ياراحم الخلق ياالله نرتجيك

مدتك تغنى ووحدك عليك الاعتماد

رزقنا وارواحنا كلبوها في يديك

يالااله الواحد اللي تصرف باانفراد

معتلي ياذا الجبروت جبار مليك

من تعزه يسلك بعونك دروب الرشاد

قدرتك فوق الملا وامرنا منك واليك

يالبنادم خاف من خالقك يوم التناد

اخفض جناح المذلة وبر بوالديك

واستمر بوصل الارحام لو شفت اضطهاد

لو تشوف بعينك الظلم لا تقطع ذويك

اعرف ان العمر يمضي ولله المعاد

والكرم مطلوب للي نصاك ومن يجيك

وان عسرك الوقت والمال تاليه النفاد

اصبر وتلقى مع العسر يسر يحتريك

كم غني اصبح فقير وهمومه بازدياد

وكم فقير صار شيخ وملايينه بشيك

ولا تغرك طفرة الوقت والعلم الوكاد

الله اللي يعلم الغيب وان راد ايهديك

- باني بن عبدالله البقمي