من سما الشعر جيت ومن تواضع سموه

هل وبل القوافي من ربيع الغيوم

سيله اجتاح وديان المشاعر بقوه

وصار له في رحاب الفكر جرح ووسوم

قلت يا شعر ما تنويه ذا اليوم سوه

دام صقر المعاني في فضائك يحوم

ابن لي ملحمه متحليه بالمروه

لان في نظمها لي مغريات ولزوم

لازمي مدح نجمٍ ساطع في علوه

من شعاعه تبدد حالكات الظلوم

وان تواضع تلامس مظهره من دنوه

يقترب لين تشعر بالدنو الرحوم

حاكمٍ كل شعبه يشعره بالأبوه

رافعٍ بيرق التقوى قوي العزوم

حزمه اعلن على روس المعادين سوه

صيرميٍ بساعات الشدايد يزوم

قرب النصر واللي للفتن شب ضوه

من لهبها على خشمه يحط الوسوم

معركة حزم سلمان اوجبتها الاخوة

ضد من خان داره والتجا للخصوم

جاهلٍ ما يفرق صاحبه من عدوه

ما يميز الين يذوق فرك الخشوم

حكمة الرأي ماهي دق صدر وفتوه

ولا تعايش جهول ولا تواطن رخوم

نالها مثل سلمان الزعيم المفوه

ثابت الرأي ماهو بالنوازل جهوم

الوطن تو عمره زان واعتز توه

رايته ما تنكس عاليه كل يوم

الوطن في ذرى سلمان يزدان جوه

غيث سلمان فينا له خيالٍ رزوم

ومن سما الشعر جيت ومن تواضع سموه

انهمر مدح في سلمان قرم القروم

- سعيد بن عبدالله الغامدي