الموضوعات الأكثر
شدّت الهاجس مراويح السحابي
يوم راجت في ربى نجد العذيّه
انتشت بالفكر واحيت كل مابي
وانتثر مكنون قلبي والخفيه
يارياض العشق ياحبٍ سرا بي
من وانا طفله مخليني شقيّه
لين ودك صار زادي والشرابي
وفيك روّضت الحروف الابجديه
ومن حلاة الجو جيت انثر زهابي
لجل عينك يا رياض الشاعريه
وارسمك لوحه على صفحة كتابي
واتغناك بلحون السامريه
واكتبك بسطور تحكي مالجا بي
وانحتك عشقٍ تهذريه البريه
وجد حالي وانطوائي واكتئابي
كلها تفنى بضحكتك البهيّه
لابتسم صبحك وبدد للضبابي
وانجلت عن ثغرك الفاتن ثنيّه
يحترك في اخر اعماقي شبابي
والسنين الماضيه ترجع عليه
ثم الز لهاجسي واسرج ركابي
وانتخي حظٍ لي عزومه رديه
وانكف المرواس من لوح السرابي
وامتثل للواقع بنفسٍ رضيّه
- حوراء نجد (سارة المعمر)