الموضوعات الأكثر
فجع الشاعر والإعلامي محمد بن سبيل رئيس مركز حاضرة نفي بوفاة والدته -رحمها الله- فكانت هذه المرثية المؤثرة..
نور الحياة وملذتها ومعناها
غابت وغاب السعد معها يباريها
الغيبه اللي من الصعب اني اقواها
لكن الايمان بالانفس يهديها
امنت بالله والاقدار وبطاها
اصبر ونفسي بذكر الله اواسيها
كتمت عبرات غيبتها وفرقاها
وقت العزا للعرب ماودي ابديها
ولاصرت وحدي عيوني سيلت ماها
حيث انها تعدل الدنيا ومافيها
وان شفت كرسي صلاة امي ورجواها
بالله.. جابت عيوني كل خافيها
ابكي وانا اشوف بعيوني مصلاها
وسريرها واتخيلها واناديها
ياشين بيتي بعد توديع دنياها
يالله تجبر عزانا كلنا فيها
يالله عسى جنة الفردوس مثواها
وعنا بالاحسان والرحمه تجازيها
ربي تجاوز بعفوك عن خطاياها
مع انها اطهر من الطهر بتفانيها
الكل يعرف تدينها وتقواها
واللي عرفها يعزينا ويبكيها
في نفي واللي يجاور من قراياها
الكل منهم بحسن الخلق يطريها
يالله عسى ماتمده من عطاياها
للي بحاجه وماتهديه بيديها
يشفع لها وانت يالمعبود مولاها
وفي جنة الخلد ياربي تذريها
يا رب وانت العليم بسر نجواها
ياعالم بالنفوس وكل خافيها
النوربوجودها والخير بدعاها
واحساسنا غير لاصرنا حواليها
الحمدلله عشنا نطلب رضاها
والكل منا بفضل الله مرضيها
ولا لحقنا جزاها من سواياها
عسى جزاها الجنان بعفو واليها
نصايح امي على الطاعه حفظناها
تحثنا للصلاة ولا نخليها
والوصل بالاهل والاقراب مبداها
وجيرانها هذي امي من يحاليها
مانذكر انا بفضل الله عصيناها
تامر علينا واوامرها نلبيها
باب من ابواب جنتنا فقداها
نحبها حب ما يوصف ونغليها
ما يمكن انا مع الايام ننساها
مافيه شي بدنيانا يساويها
والله مانسى خضوعي عند ماطاها
ودعواتها لي عسى المعبود يرضيها
نفسي على الله بعد الام شكواها
عزاه ياليتني بالروح فاديها
وشلون ابرثي ضيا عيني وسلواها
اكبر من الشعر حزني كيف ابرثيها
- محمد بن سبيل