الموضوعات الأكثر
مهداة لصاحب السمو الملكي الأمير محمد بن نايف بن عبدالعزيز ولي العهد نائب رئيس مجلس الوزراء وزير الداخلية «حفظه الله»..
سلام للنادر من القلب ويزيد
في كل يوم من القلوب الصحاحي
أبا أرسله وأردده زود ترديد
من اليمامه كل صبح ورواحي
للي قدومه للبلد كنه العيد
وغيثٍ على سكان مدن وضواحي
محمد اللي صايب الراي ويجيد
فتل الحبال ونقضها بارتياحي
وحبه لشعبه ما يبي زود تأكيد
وهم حبهم فيه الولا والنجاحي
يا أمير لو إنك عن ابلادك إبعيد
عينك عليها فالمساء والصباحي
لو كنت فالخارج ورى نازح البيد
مضفن عليها من جنابك جناحي
نامت قريرة عين من كل تهديد
ابفعلك ومجهودك وحد السلاحي
ويا أمير يا صنديد من راس صنديد
ماكن نايف عن مباديك راحي
يا الله عسى الفردوس مثواه وشهيد
ويسقى من الكوثر شراب قراحي
ما حدت عن مبداه شيّدت تشييد
عال المبادي بالوفا والصلاحي
وما تبذل إلا كل مضمون ويفيد
شعبك وينعم بالرخا والرباحي
مبداك عدل ولا يجي فيه تصديد
يا الشامخ الثابت إمداو الجراحي
من مدرسة نايف تقود الأماجيد
فيهم على الاقدام عزم وكفاحي
يا موجّه الأبطال وقت المواعيد
عند الأمن ما فيه عفو وسماحي
جوّدت حبل الأمن بيديك تجويد
من قرّبه وسط الميادين طاحي
الضرب فوق المتن بالراس تحديد
يا راسم الخطه بليا تواحي
يا مسدد الأقوال بالفعل تسديد
يا محقق الأهداف بالاقتراحي
جهزت جيلٍ من خيار الأواليد
الكل منهم عند إشارتك صاحي
دربتهم تدريب كلٍ به إيشيد
ما فيهم اللي عن وصاياك شاحي
يا الله عسى التوفيق لخطاك وسعيد
ويدوم عزك فالعلا والفلاحي
- مطلق بن فيحان الصوينع العتيبي