الموضوعات الأكثر
عدّيت في عالي طويل المراقيب
ضلعٍ بنجد مصعفقته الهبايب
عدّيت فيه مجاوبٍ عاوي الذيب
ذيبٍ حداه الوقت يقنب قنايب
هيّضت مثله صرت أجر التقانيب
والقلب كنه فوق صال اللهايب
لهيب نار الموغله بالمغاريب
الشر مهنتهم لفوبه كسايب
أهل النفاق ملحقين المشاهيب
شر البريه بالفتن والخنايب
خوارجٍ سفّاك أدوات تخريب
لا عقل يضبطهم خباثٍ خوايب
جندٍ تشب النار زور وتكاذيب
ساقوا ضعيفين المعرفة جلايب
تناسوا الماضي وساع اللغابيب
بشدوقهم وفواههم كاللهايب
تنبح بنار الحقد نبح الاكاليب
ركايب الشيطان تهذب هذايب
واللي تنكّر فاسقٍ خاب ومخيب
مثير الفتن ما جاء به ابليس جايب
متغنمٍ منه الهزر والهذاريب
اخسوا خسيتو يا وجيه الزلايب
نسيو غثا هاك السنين المجاديب
يوم التشتت والجهل والنكايب
يوم أن نجد مطلقته المقاضيب
ومثله يدس الراس بين الخرايب
وينه وجده والبو بماضيٍ هيب
يوم الفتن كلٍ رجع منه هايب
يوم الجهل والمال يوخذ تناهيب
والحكم حكم الغاب والراس شايب
والجوع والأمراض والوقتٍ صعيب
ونجدٍ تكانفها الفتن والمصايب
وشرواه غادٍ مثل خطو الرعابيب
اللي ليا ضاقت دموعه سكايب
لما ظهر له صقرها فايح الطيب
حرٍ بمخلابه وسيع الضرايب
عبدالعزيز الفيصلي طاهر الجيب
من اجلها فادا وخاض الحرايب
بعزمٍ وحزمٍ مهرفن كنه الذيب
على أربعينٍ جاء يحث الركايب
خاض الحروب وفك عسر اللواليب
عنها بفضل الله جزيل الوهايب
وحّد شتاته بالسيوف المحاديب
دوله على الملّه وفك النشايب
عبدالعزيز اللي بعيدٍ من العيب
ابنه ابن حكّامه أصل ونسايب
بالشرع ثبّت له وثيق الاطانيب
واستأمنت والعيش به صار طايب
رفع حضارتها بكل المواجيب
له هيبته ما بين حاضر وغايب
دولة عدل عند العرب والأجانيب
له قدرها لا صوتت قيل صايب
دستورها القران ما عنه تجنيب
وسنة ختام الرسل هو خير تايب
واليوم سلمان الملك قاد ومصيب
قاد المسيرة بالفنون العجايب
والشعب حنا والسعود المعازيب
والشرع مرجعنا بكل النوايب
عسى موحدها بأمر عالم الغيب
يفوز يوم الحشر وقت الكرايب
مع النبي الهاشمي والأصاحيب
أصحاب خير الخلق وأزكا الصحايب
عليه أصلي عد ما بان ويغيب
واعداد ما تنزل حقوق السحايب
صالح بن عبدالعزيز الرميان - القصيم