الموضوعات الأكثر
مع كل نسمة يا وطنا تحية
والله نحبك حب مافيه قده
ياتاجنا اللي روسنا به قوية
يا نبضنا اللي دمنا دون حده
نستاهلك نور ملا العين ضيه
ونبنيك صرح ما انخلق من يهده
لو عنك نحتنا الليالي نحية
جيناك كل زود شوقه يحده
كلك دفا ياحضن نجد العذية
هي بس نجد اللي تزف المودة
شف ثغر حايل شف هوى ابها البهية
شف غرة الدمام شف كف جدة
شف حكمة الراعي وصدق الرعية
والخير مقبل والضغاين مصدة
بحبوبة من سلسبيلك هنية
يفرق بها التاريخ هزله وجده
يكفيك بيت الله ومنزل نبيه
وشرع من كتاب الولي تستمده
اطعمك من جوع امعبود البرية
و آمنك من خوف وفجيعة وشدة
النفط من قبله يدينا ثرية
ومن نشد التاريخ يقنع برده
حنا الوفا حنا الكرم والحمية
حنا هل التوحيد صدقٍ نعده
قربك وبعدك ياوطنا قضية
وانا من اللي قصروا فيك مدة
مناخك الحافي ورمضاك فية
واقسى تضاريسك فراش ومخدة
- ناصر القحطاني