تغنّى عدد من شعراء الزلفي، ونثروا أجمل عبارات الترحيب، وسطروها بقصائد جميلة ترحّب بسمو أمير منطقة الرياض صاحب السمو الملكي الأمير فيصل بن بندر بن عبدالعزيز.

انثري يا ديرة الزلفي ورودك

وافرحي لا زارنا ضيفٍ كريم

ضيفنا فيصل ولد بندر وزودك

جده التاريخ سماه الزعيم

شوقنا جمرٍ حرق لك طيب عودك

اقبلي له لا حضر مثل النسيم

وافزعي بالطويق لا صار بحدودك

ورقصي له يمكن بحسنك يهيم

ان سالتينا عن النخوه شهودك

انتي أغلى دار والله العظيم

كل ضيف زارنا لازم يعودك

صرتي بقلبه مثل شوق النديم

سيدي كلن تباشر في جودك

طلتك نورٍ محى وجه العتيم

كل منصف سيدي يشكر جهودك

وما جحد جهدك سوى رجلٍ لئيم

- (أحمد عبدالرحمن المدعج)

* *

ياهلا مرحبا ياميرنا الغالي

زادت افراح ديرتنا ومن فيها

يوم نورك سطع بالنايف العالي

رحّبت ديرة الزلفي واهاليها

تو ما جزل قاف الشعر يحلالي

والقوافي تغنّت بك معانيها

سيدي فيصل اسمع ما تهيالي

تفتخر بك بيوتي يوم اسويها

وانت نسل الملوك وطيب الفالي

كيف ما اصخر لك ابياتي واغنيها

انت امير الرياض وحامي التالي

وانت من بعد رب الكون حاميها

ويوم شرّفتنا يا ماض الافعالي

تكمل افراحنا لجلك ونحييها

تكمل افراحنا ياميرنا الغالي

وفازت بشوفك الزلفي ومن فيها

- (حمد العثمان السكران )

* *

الله اكبر يوم هبت ذعاذيع الجنوب

واستخالت مزنة ما فصل براقها

برقها يبرق ورعادها جاله نحوب

العيون تخيلها والهوا يستاقها

لين بين من مطرها الحيا في كل صوب

واختلط نوّارها وابتسم رقراقها

كن ريح خزامها كل ما هب الهبوب

طيب عذراً تزرع الولف في عشاقها

يوم جا فيصل تباشر بجيته القلوب

وكل عينٍ كحّل رموشها واحداقها

نادرٍ راسه على العز والطيب معصوب

سيرته عطره يبث النسيم اعباقها

افتخرنا بالزيارة وفاخرنا الشعوب

باحتفالٍ كل حفلة تسوى فاقها

والوطن حقه علينا وجوب اكبر وجوب

ديرةٍ من ذاق ماها يعاف فراقها

قالها شاعر ليا وقف عن ربعه ينوب

وياصلاة الله على المصطفى باغلاقها

- (إبراهيم أحمد المنصور)

* *

الشعر له قيمه وغايه واتجاهات ومجال

ياخذ مجاله في معانيه الكبار ودورها

من ماضي الايام يحسب للعوارف راس مال

يرضي ضمايرها ويشرح ما تكن صدورها

بيوتها الجزلات تنقشها على صم الجبال

وتبقى على مر الزمن والنور بين سطورها

هذا مثل واليوم للشعار وقفه وامتثال

تاقف لواجبها بصدق احساسها وشعورها

تعلن سعادتها وترسم صورةٍ فيها الجمال

مضمونها حب ووفاء ومشرفه بحضورها

تنقاد تقدير وغلا والهيل في صفر الدلال

فنجالها ينساق لرجالٍ طوال شبورها

يامرحبا يا اميرينا يانسل وافين الخصال

ترحيبةٍ يبقى سعدها مع مرور شهورها

حييت يافيصل يا رمز المرجله والاعتدال

شرفت والزلفي تشرف فيك يوم تزورها

بقدومك الميمون نفرح والمحبه لاتزال

والدار نورك زاد يا وجه السعد في نورها

شفنا الوفاء منكم وفيكم من قديمات الليال

تشهد تواريخٍ توثق ماضيات عصورها

من عهد ابو تركي ومجد المملكه فيه الكمال

لعهد سلمان الوفاء حصن الديار وسورها

الله يديم امن الوطن في كل وقت وكل حال

والله يجعل كيد عدوان الوطن بنحورها

- (أحمد سعود الحمد)