عسى الله يجيب اللي يصب أوله وأتلاه

سحابٍ من المنشا تسبّح ملايكته

سنا برق نوّه لا لمع من جهة منشاه

تفاجا به الأرصاد ما هي بمدركته

صدوق الحيا سيله يسابق غشاين ماه

على وجه الأرض وماه ما يسبق بركته

يجينا تقول إنه حزينٍ يجرّ خطاه

على ما مضى نادم والأيام منهكته

سبب من تركها لاشهب اللال والمضماة

وهي خدها لمزونه الغرّ تاركته

على اليابسة كنه يبي يسجد لمولاه

يا لولا يد المولى عن الأرض ماسكته

ضحك ثم بكى سبحان من ضحّكه وأبكاه

مثل عاشقٍ تبكيه الأيام لا أضحكته

تكاشف مزونه كنّ برقه من محيّاه

يصوّر مسايل ماه ويتابع حركته

غرام بدويٍ يتبع إبله ولا يشعاه

سوى بارقٍ فيه أكثر الناس شاركته

تخيّل مخاييله لعيني وبذن الله

يخيلونه أهل المملكة غرب مملكته

ويعمّ الله بنفعه ربوع الوطن وارجاه

ولا عاد يبقى جيب في وسط بايكته

- سلطان مطلق الشتيلي المطيري