ليت الزمن يرجع ورى وافتح الباب

من قبل اسولف عنه لأوّل أحفادي

بحاول أبحث معه في شتّى الأسباب

عسى سبب واحد يحقق مرادي

تعبت من ضحك الثنايا بلا ناب

على قدى وإلا على غير قادي

يا صاحبي لو صاحبي مالها أصحاب

كلمة تدوّر هالزمن من ينادي

صاحبك صادق حيل والوضع كذاب

يجمع شتات العمر والعمر غادي

بارت عزومه بين مبغض وشذّاب

لبسوا له ثياب القيم والمبادي

رقوا على متنه على كل مرقاب

واللي سند منهم يقول استنادي

ويا شجرة الوادي بقى فيك عنّاب

وإلا حداك الضلع والضلع حادي

محسوبك أفنى دونك العمر ماهاب

ليلك وصوت سباعك بكل وادي

حتى يباسك قش في حبل حطاب

وأنا على شوكك حصدت اجتهادي

غنيت لك وارهيت من كل ما طاب

أجود لك وأقول لرضاك عادي

واليوم يا معشوقتي شاعرك شاب

عقيد قوم ولبس بشت اعتقادي

جودي عليّ بضوء لو ضوء مشهاب

الوضع كسّر محزمي مع شدادي

أصبحت أخيل الغيم وأمسيت مرتاب

رغى بعيري قبل يصهل جوادي

واللي زرعته من مواثيق الأحباب

هو نفسه اللي بار لحظة حصادي

- نايف المطيري