الوسم يا حمدان قرّب حسابه

والليل قام يطول واستبرد الليل

واقفى نظام الصيف واقفت ركابه

والجار عند الجار يبغى التعاليل

في مجلسٍ للضيف مفتوح بابه

ثابت سواة الجدي واليا بدا سهيل

راع الولع قام يتفقد زهابه

تالي نهار ورحّل الهم ترحيل

ممشى طرب هذا السؤال وجوابه

سوالف رجال ومجالس رجاجيل

اترجّع الشايب لزهرة شبابه

وتطري على باله علوم وتماثيل

ساعة زمن مرت مرور السحابة

ما فيه تعديلٍ ولا فيه تبديل

كلٍ من أهل البلّ ذوده مشى به

وكثر المزايد في ليال المحاويل

ما بينهم بالطيب قدر ومهابة

ودايم غناة النفس هيلٍ بلا كيل

نشا سحاب الخير يا مرحبابه

واستبشروا كل المخاليق بالسيل

حتى الطيور بكل وادي وغابة

من الطرب قامت تجر المواويل

والروض عقب السيل زانت ثيابه

كنه عليه الزل جملة وتفصيل

- صالح الناصر