استريح شوي واسمعني ثواني

بعدها مسموح.. قول اللِّي تقوله

جيت لك والقلب ما هو بالمحاني

شف قبل لا أوصلك سابقني وصوله

ووالله أن لولا الغلا ما جاك عاني

يا بعد منهم بكوله وضحكوله

عاشقك سوّاح!! وعيونك مواني

اخذني.. من الحزينه.. للخجوله

ابتسم خلني افضفض لك عشاني

الحكي غصنٍ عجز صوتي يطوله

تعقد احجاجك وتعقد لي لساني

المطر يا غيم ظميان لهطوله

خاطري مكسور من قسوة زماني

وان (كنّْك إياه) وفعولك فعوله

تعتبرني.. شخص مغرور وأناني

واعتبرك.. الكون في عرضه وطوله

آه لوْ تحسْ بجروح الأماني

كان ما تزعل علي.. بها لسهوله

حط (عمرك) يا بعد (عمري) مكاني

وان لقيت قصور؟ قول اللي تقوله

وانتبه ياسيد الغيد الغواني

التشرّه والمعاتب له أصوله

لا تساومني ولا تجرح كياني

كل شيء إلاَّ الكرامه والرجوله

- محمد جار الله السهلي