الليله الهاجوس بانت خفاياه

دنّت مزاميره ولاحت بروقه

قلبي كثيرات الروابع تولاه

يلعب به الريح الشمالي طروقه

همٍ تغدى به وهمٍ تعشاه

وهمٍ على مالا يوده يسوقه

الفضل لله فاول الوقت واتلاه

والخالق الله والعباد مخلوقة

والرزق عند اللي جزالٍ عطاياه

مرسل من الغيث المسّيل حقوقه

والناس شيٍ عندهم مانت وياه

لو تطلب الي عندهم ماتذوقه

الذل موت وشيمة الرجل تنهاه

عن كل شي في حياته يعوقه

واللاش جعله روحة مقيط ورشاه

مراح طيرٍ ما خذينٍ سبوقه

لاخير في اللي مالحق ماتمناه

لاصار ماكسب المعالي يشوقه

الي يهين النفس في حضرة عداه

عليه ذنب ماتخايط فتوقه

لاشفت من يعمي عيونه بيمناه

ومخالفٍ ذوق الرجاجيل ذوقه

ابعد وخله عند مثله وشرواه

الارض تحته والسماوات فوقه

يقولها اللي عاش وقته وعاناه

من ضيق صدره حرّق الدمع موقه

- محمد الفالح