نعم نعم يا دار تفداك الأعمار

وتبقى رفيع السور وإبليس مدحور

وتبقى ملاذ لمن شكى سو الأقدار

يلوذ في سورك ولاهوب مقهور

يحميك رب البيت عن كل الأخطار

فيك الحرم يا دار الأجواد معمور

منصى عباد الله حجيجٍ وعمّار

بأمن ومان يطوف بالبيت ويزور

وحنا بأمر الله ليا صار ما صار

درعك عن الأشرار وتعيش مسرور

في ظل حكامٍ طويلين الأشبار

آل السعود مدللة كل ممرور

حكامنا اللي مايهابون الأخطار

بأمر الولي يمشون أمر ومامور

قرومٍ سلايل متعب مهار وبكار

مرٍ على سرجٍ ومرٍ على كور

عبدالعزيز مطفي النار بالنار

في ساعةٍ فيها احمر الدم منثور

وحّد قبايل نجد باسلوب وافكار

وكلٍ جعل له في شؤن الحكم دور

وضم الحجاز لنجد واستكمل الدار

دارٍ رفيع الشان ما يشبه الدُّور

- ابراهيم راشد الكويبين