الموضوعات الأكثر
«الجزيرة» - عبدالعزيز بن سعود المتعب:
الولاء والوفاء واللحمة الوطنية والشعر الوطني المُشرِّف يجسده الشاعر الكبير عبدالله بن عون عبر قصيدة جديدة خص بها صحيفة الجزيرة في مقام سيدي صاحب السمو الملكي الأمير محمد بن نايف بن عبدالعزيز ولي العهد نائب رئيس مجلس الوزراء وزير الداخلية - أطال الله في عمره وأدام عزه -:
يالله ياللي مالنا غيره اله
يالعالي اللي مايشارك علوّه
ياواحدن تسمع ندا العبد ودعاه
وما يختلج في خاطره في خلوّه
حبب الينا ماتحبه وترضاه
وانعم علينا بالامان وهدوّه
بجهود زيزوم امننا لاعدمناه
اللي لمدحي في سموه جروّه
زيزوم الامن اللي علينا الله اضفاه
ومخلف مسار اهل المسار المشوّه
مخلف مسار اللي يخامس بيسراه
واللي بجسمه زارعن له عبوّه
من بان منهم لـمّس السيف علباه
حتى يضيّع في رَواحه غدوّه
من يعمل الحسنى على قدر حسناه
يجزى وراع السو يجزا بسوّه
يامن مقام ولاية العهد تزهاه
لاعلى المناصب في سموه كفوّه
شق الطريق وكل منصب تعداه
لين استوى فاللي يليق بسموّه
ياكبر معروفه على الامن كبراه
قوة سموه زادت الامن قوّه
كم هجمتن شرسه تصدت له اضواه
واصبح ينوه عن فشلها المنوّه
الله يضلّل به علينا ويرعاه
ويعز صدقانه ويخزي عدوّه
ويمد له في طولة العمر مولاه
لمكافح الارهاب واخماد ضوّه
ابدا بشرحي عن سموه من ادناه
واصعد معه لين اعتلي في علوّه
اللي يبي له نبذتن عن سجاياه
من يوم توه في حنان الابوّه
شفنا تباشير السعد في محياه
من يوم هو في مبتدا العمر توّه
من يوم عمره بالطعش لافقدناه
وهو بين مدرسة الكرم والمروّه
ولاخاب فيه الضن والحمد لله
جاء من ورا الهقوات طلَعه ونوّه
الابو نايف عامر الصيت والجاه
شيخن لذكره بالمحافل طروّه
شيخن جميع الحل والربط بيداه
وزيزومها لا جاء النهار المعوّه
نايف عسى الجنه مقره ومثواه
في جيرة اللي فضلو بالنبوّه
وعبدالعزيز الفيصلي راس مجناه
وابن مساعد يلحقه بالعنوّه
وختامها دور محمد وتلقاه
انصه ليا قلو رجال الحموّه
في حبل عدله من تمسك بيمناه
لا يستريب ولا يحسه جفوّه
- عبدالله بن نايف بن عون