الحذر

الخطأ رغم الحذر دامك بنادم وارد

اعرف اللِّي ينصحك واللِّي يدوِّر زله

وان عرض لك من وجيه البغض وجهٍ بارد

اسفهه مادام سفهانه.. يزوِّد غلّه

- سلطان بن بتلاء

***

الوسم..!

يا صاحبي سر الشّبه والتشابه

راع القلم ما عاد حبر القلم له!

اللِّي على ممشاك ممشى ركابه

الوسم وسمك لكن الزمل زمله

- هلال المطيري

***

الصداقة

لو جارت الدنيا عليك وتضايقت

حاول تكون اللِّي ما احد يستفزّه

وإن كان غرّتك الرفاقه وصدّقت

لا تنصدم لاخانك اللي تعزّه

- عطا الله فرحان

***

العتب

هذا الزمن لا عاد تشره على الناس

ولا تعاتب كل ما شفت زلّه

كثر التشّره والعتب يوجع الراس

من جاز لك جز له ومن شان خلّه

- خليل بن هدلان