رفيقك الغالي ليا حس بالك

في مجلسٍ فيه اكثر الناس يوحون

أحلم وخلّه واجعل الدرب سالك

وخلّك على ماقيل طيّب ودندون

يمكن طراله شي ما قد طرالك

ويمكن من ظروف الزمن صار مشحون

حاول تعذره وانس ماقد جرالك

ولاتشعل الجمره على راس غليون

وادمح خطاه ولا تشح بوصالك

وما صار خله بين الاضلاع مدفون

واحذر تقول اليوم مالي ومالك

ولاتصير بضايع الهرج مفتون

بعض الهروج تورّدك للمهالك

وتعيش بعد العز من دون في دون

يمناك ما تصفق بليا شمالك

ورجلٍ بلا ربعه من الدهر مغبون

خل الخصال الطيّبة هي خصالك

وسيع صدر وكل ربعك يمونون

لا بد ما ترحل وتقفي رحالك

والدايم الله والمخاليق يفنون

- عبيد فالح أبو جراح ابو ثنين