مريت بالدنيا علي وتعديت

مثل السحاب اللي سقى الكون واقفى

ياليت يوم أنك على الحي مريت

سمعت صوت اللي ترجاك تكفى

وارسلت بمزونك على الدار وابطيت

لين الفؤاد اللي تعب منك يشفى

تعبت من شانك ولا عاد حسّيت

كادت أخطاي من المشاوير تحفى

كانك خذيت من الهوى شي واعطيت

من علّمك باخر لياليك تجفى

كنت أحسبنك وافيٍ يوم حبيت

لكن ظهر عكس الذي كان يخفى

ضربت في رمح الخيانه وسويت

جرحٍ بقلبي غايرٍ دوم يزفى

سرت بطريق البعد حتى تماديت

ولقيت لك غيري من الناس ملفى

إن جابتك سود الليالي ولي جيت

مركبك ما يلقى على السيف مرفى

ابي أتسلى دام عني تسليت

وباكر عتام احداث الأيام تصفى

- أحمد حمدان الشمري