قلت أسرّيها على الغيم وتفلّه

صرخةٍ جت من ورا ضلوعي دفينه

جبتها يوم الخواطر مسفهلّه

في نهارٍ يلبس ثياب السكينه

تطوي الارض لحفيد الطيب كلّه

من تسمّاه الفخر واطلق جبينه

من على الطولات سيف المجد سلّه

والمراجل كلّها جت في يمينه

فخرنا محمد ومن ياصل محلّه

ساكنٍ فينا وحنَّا ساكنينه

طير حوران وسليل الطيب من له

في ميادين الفخر أكبر مدينه

ولد منهو ظلّنا بالخير ظلّه

بوفهد ياجعلها تبطي سنينه

كفو من ربّاه بالعز وفطن له

لين صار الحر وش كبره بعينه

فيه ظن ابو فهد ما خاب لله

جا على الظن يتهادى من عرينه

ودام هو نبراسه وهو قدوةٍ له

ماعليه خلاف من حينه لحينه

فيصليٍ يعقد الراي ويحله

والشجاعه سيفها يزهى يدينه

حرٍ يدل النواميس وتدله

مسرج خيول الهقاوي خابرينه

من بحر سلمان خل العلم خله

مرتوي من حكمه وحزمه ولينه

وان كتب تاريخ الامجاد بسجله

سيرته فاح بشذاه وياسمينه

منهو مثل محمد ومنهو وصل له

وينه اللّي يشبهه وينه ووينه

- خالد الجبر