باسم شعب المملكة من جنوب ومن شمال

من مشارقها إلى غربها وجبالها

نشكر العاهل ملكنا عسى أيامه طوال

لفتته للشعب كل الوطن غنّى لها

المواطن صار في خير وأوضاعه عدال

عايشٍ في دولة ما يريد بدالها

ياملكنا والله إنك لشعبك راس مال

لو سألت الشعب بلسان واحد قالها

بعد ما امطر وابل الخير ياشعري تعال

احتزم مال المواقيف غير رجالها

تو طاب الكيف والشعر إلي جاله مجال

كل بيبان القصايد فتحت أقفالها

جعل شعرٍ ما ينومس بوافين الخصال

ما يصح لسان راعيه كانه شالها

انت عزٍ للمواطن ودون الدار جال

وانت لاكبرت حمول الوطن تشتالها

من ملوك الناس مالك حلي ولا مثال

تتصف بالعدل والطيّبه تسعى لها

كامل الأوصاف وافي ولله الكمال

الصفات الطيّبه شاربٍ فنجالها

الله انه يحفظكم من غدر سود الليال

يا حبيب الشعب وارض الوطن وآمالها

انت غيثٍ للمواطن وعز وراس مال

شجرةٍ لا احترت الشمس ظل ظلالها

يامسو الكيف لا فاح في صفر الدلال

خص ابوفهد من اللي تسوق زلالها

حي ابو فهد ليا قام شيّال الثقال

المراجل تنحني له وهو يزهالها

شامخٍ راسه وثابت مثل شم الجبال

وكان كبرت عند غيره فهو حلاّلها

الختام أقول يالله عليك الاتكال

دام عزك يا بلادي بروس رجالها

- سهل بندر بن حياد المقاطي