في أصعب مواقف الحياة ودعت والدي وحبيبي وقرة عيني، وفي أصعب خلجات النفس كتبت أبياتي رثاء في روحه الطيبة والنادرة..

داعية الله أن يجبر كسر قلبي، ويجعل لياليه عنده خيرًا له من الدنيا وما فيها.. وقد كتبت أبياتًا متواضعة في شخصيته الكريمة - رحمه الله -.

يا شعري لا تبكي وأنا توّني بأوَّل بيت

أحتاج أبياتك توصف الحزن اللي فيني

أبي أرثي أبوي اللي بـ(دلاله) تهَنّيت

واليوم بعد هالعمر ودعته إيديني

من وين أبدا هل أبدا من وحشة البيت

أو من حرقة الشوق ومن هزَّة حنيني

كنت تسعدني بس لا جيت جمبي ومرّيت

ولا ضاقت بي بس أسمع صوتك يكفيني

لا ما عمرك تنساني بكل مرة تقضّيت

والله كل شي أبيه إلين عندي يجيني

ما تعرف تجرح لكنّك وش كثر داويت

وان شفت جروحي ما تبي غير تداويني

تسوي السَّوايا بدون قول تراني سوّيت

كنّك تقول يكفي تشهد لي موازيني

يا بوي من فعل الخير قل لي وش بس بقّيت

كنّك تقول بالخير مين يقدر يجاريني

ولا مرة وحدة رفعت صوتك وعلّيت

على بشاشة وجهك إيه انت مربّيني

أفخر اني على طيبة قلبك تربّيت

كيف بس ما أطيب الناس تروح وتخلّيني

أول أسبوع وما تدري وش كثر حنّيت

كيف عاد بباقي عمري وباقي سنيني

والله أحس إني بحلم من يوم ما توفّيت

ومن هذا الحلم ليتك تجيني وتصحّيني

الله يرحمك كلمة كل ما أقولها غصّيت

وكل مرة أسمعها أحس بها تكويني

صح الجسد ما بس انك بروحي حييت

ويبقى طيب ذكرك بين كل الناس يحييني

لو قالوا وش أتمنى كان والله تمنّيت

أضمّك حيل لين أصير أشم ريحتك فيني

ليتك آخر مرّة قلت فيها اسمي وناديت

تركت كل شي وجلست أسمعك تناديني

يا ليت يا بوي والله ومليونين يا ليت

بس الحمد لرب أدعي انه يقوّيني

لولا ذكر الله والا كان تلقاني جنّيت

اللي ذكره يمسح على قلبي ويهدّيني

أوعدك ما أنساك من دعاي كل ما صلّيت

وأوعدك أختم باسمك بكل سجدة جبيني

والله مَ أوفيك يابوي مهما كتبت ودعيت

ما أوفيك ياللي عاش طول عمره بس يوفيني

الله يسعدك على قد ما أسعدت وأعطيت

ياللي عشت عمرك بس همك كيف تعطيني

تمنيتك تشيل عيالي وأقول سمّيت

أحمد اللي من حب اسمه أغلى جنيني

ظهري اللي ما دامه عايش ما عمري انحنيت

وأكثر شخص كان حنانه بالحيل محتويني

بس عزاي انك من كل آلامك تشافيت

احساسي بك مرتاح هو اللي بس يشفيني

فيك يابوي كل هالعالم وهالدنيا عزّيت

وما يكفي لو كل شخص بهالدنيا يعزّيني

والله يابوي كثر ما بعمري فقدت وبكيت

ترا دمعة فرقاك أكثر دمعة حرقت عيني

- لمياء بنت أحمد المنديل