الموضوعات الأكثر
عشت يا فخر العرب والمسلمين
يا مليك العز يا سيف العدال
فزت يا فرز الوغى دنيا ودين
عالمياً فزت وأحييت الآمال
يا الزعيم اللي قهرت الحاقدين
فخرنا يوم الرشا ركب المحال
الصقور أبناء البلاد البارزين
بكل جولة يرفعون الراس عال
ومعهم صقور الخليج الآخرين
كلهم نعم الصقور بلا جدال
اشلعوهن من قواعدهن بحين
اقلعن وقت السحر لهن اجتوال
للصواقع من مخابيهن حنين
حن رعدٍ بارقه يشعل اشعال
احرقن وزلزلن وكر اللعين
لو تخفى وانجحر تحت الجبال
وعندنا بالبر أسود ضاربين
بالسلاح اللي مجهَّز للقتال
وبالبحر قوات بحرٍ جاهزين
قوةٍ من شافها صابه جفال
للأشقا دوم حنا شاكرين
شاركونا يوم شدن الحبال
ويلكم يالمجرمين الخاينين
شمسكم غابت وليلكم استطال
يوم نادى الجار قلنا حاضرين
اطمئن يالجار، خلك بالظلال
عند زيزوم العرب والمسلمين
الملك سلمان ليا حل المجال
ومعه شجعان الخليج الطيبين
إيد وحده كلهم في كل حال
كلهم مثل الأصابع باليمين
نصرةٍ للحق وضد أهل الضلال
والله اللي ما بغيره نستعين
الكريم اللي عليه الاتكال
- معيوف بن عقيل الحربي