الموضوعات الأكثر
الا ياهل القلوب الواعية فالنصح والإرشاد
منافع للرجل من شان الاخطار يتفاداها
انا شفت وسمعت أمور منها عفت حلو الزاد
امورٍ معضلة مايحمد الانسان عقباها
شباب المسلمين اصبح ضحية في يد الاضداد
خفافيش الدجا اللي كثرة أهل الشر مغزاها
من اسباب المخدر والكحول وماحوى الافساد
فساد يتلف عقول البشر ويضيّع ارياها
احد خلف القفول المحكمات مقيدٍ بقياد
واحد وسط المشافي علته يستصعب دواها
واحد بين الشوارع تايهٍ حاله وعقله باد
لو النار اللظية تلتهب قدمه تنصاها
حسب تفكيرهم بانه علاج وللجروح ضماد
وهو سمٍ سقطري يدمر الروس وخلاياها
ويجلب سمعةٍ سية وهمّ وضيقةٍ وانكاد
ياكم رجال قومٍ كانت الاطيب ووطاها
يعيش الرجل في مبدى العمر من خيرة الأولاد
ويصبح من ضعوف الخلق لاجاته واذا جاها
غزونا به هل العهر ودعاة الكفر والالحاد
الا يالله يالمعبود لاتغفر خطاياها
عقوق الوالدين مصيبةٍ عظمى وسم اكباد
حصل من بعد ماجانا بلاها الله يبلاها
يبون يفرقون الامة اللي نورها وقاد
على سنة شفيع الخلق في يوم البعث طاها
وهذا امرٍ على ضعاف الجهد مستبعد استبعاد
عزايمنا قوية فاول الدنيا وفاتلاها
ترى حنا عمار بلاد ماحنا دمار بلاد
وقومٍ صفها مع صفنا ماخاب مسعاها
شهرنا فالقمم وطيور شلوى ماهي بتنصاد
سوات اسلافنا ننهج مناهجها وممشاها
يعيشون الملوك اسيادنا والنعم فالاسياد
ال سعود وجميع الشعب فحمى الله وفحماها
مشاهدهم بخير وعافية عيد من الأعياد
وتحت ظل العزاز احلى ليال العمر عشناها
مساعيهم لفعل الخير موروثه من الاجداد
وهم ضد اي حاجة شرع رب الكون ينهاها
وتم القول والشاعر لعل بما يقوله فاد
نصيحة والنصيحة طيّب الفكر يتمناها
- مطلق بن نعيّم السبيعي