الموضوعات الأكثر
المرجلة والطيب والدين والجاه
هذي تكمل بعضها كان تدرون
ومن لايحوش العز في كف يمناه
ماتنقضي حاجات من يتبع الهون
لاشك فعل الطيب كلٍ تمناه
وفعل المراجل منوة إلي يتمنون
واليا كساه الدين والجاه خاواه
سعادة الدارين للي يريدون
لكنها ضلعٍ عسير بمرقاه
ميهافة عسرة على الي بيرقون
والمرتفع ماكل شخص تهقواه
الا الذي درب المعالي يرومون
الا الذي اصله على العز رباه
جده وابوه اللي على العز يمشون
نفسه على فعل المراجل مضراة
من سلم شيبانٍ عليها يربون
على الوفا والطيب دربه وممشاه
ماهو من الي مشيته دون في دون
كريم طبع وكل الأجواد تنصاه
مدهال ضيفانٍ على البيت يلفون
رجلٍ على وضح النقا دوم مبداه
هرجه على العاقل رزين وموزون
ماهو من اللي لاحكى زخرف حكاه
يعطيك من هرج المواثيق ويخون
هذاك لوغنى لك الحب بشفاه
لايخدعك لو اطرب القلب بلحون
بس يتلون يشبه لطبع حرباه
في كل مرة يصبح لحالته لون
طبع النذالة فيه من يوم منشاه
لابد ماياطا على الكبد بالهون
هذا العدو وطبع الانذال يحداه
لاصار فيه الكره والحقد مدفون
لاتامنه والله عليم بنواياه
واحذر ترى يالقرم ماهوب مامون
لاتصير مثل الي نقل داه برداه
خلك فطين لدبرة الي يكيدون
ومن لايخاف الله بفعله ويخشاه
احذر ولا تامن من سيوفه طعون
هذا كتابي للذكي كان يقراه
نصيحة للي من الناس يقرون
وختامها واعداد سحبٍ نثر ماه
على النبي ياللي قريتوا تصلون
خالد عبدالعزيز العصيمي - الغاط