اقرب حبايب يا بعد الناس ليّه

بعيونهم شفت الزعل والمشاريه

بإسمك جرحت قلوب غصباً عليّه

من كثر ما اخطي بالأسامي واسمّيه

يا كثر ما اخذني ورى المقدريّه

ويا كثر ما هيجنت بالصوت اغنيّه

وياما اعتذرت وجبت نفس الخطيّه

القصد اكحّل عذر دعواي واعميه

الناس ماهي مثل الأول غبيّه

ابو سَنَه ينهيك قدام تنهيه

الله يسامح حكمة الجاهليه

والحر واللِّي قال لك لا توصِّيه

والنيّه اللي قبل ماهيب نيّه

والواقع اللِّي ما تهقوى هقاويه

على العموم أرجع لنفس القضيَّه

حبك وحاضر جرح حبك وماضيه

ذيك الليالي يومها في يديّه

قلبك على كيفي وأجيبه وأوديه

واللي حصل لي منك شربة ضحيّه

غلطة عمر ما ادري وش اللي تساويه

واقفيت مجبر بين حسنه وسيّه

اقفايت اللي ما لقى من يناديه

- دحيم النومسي