الموضوعات الأكثر
يوم الدماس اغتال جو المخاليق
واضفى طرف بشته على كل شاهوق
ناجيت بالهاجوس بعض الطواريق
واخترت طاروق مهوب أي طاروق
طرح الشبك ما جندلوه التفافيق
لاهوب مطروق ولا هوب مسروق
تفتحت له مغلقات الصناديق
يحمل ولا برقا ويحمل ولا روق
لقيادة معها من الرب توفيق
العدل فيها بين الأخصام مسيوق
حكّام شعبٍ ما يبوق المواثيق
له بالولا المعهود ساسات وعموق
ما في ولاه ولا نواياه تبريق
الأوفاه اللِّي بالاخلاص مرفوق
يمزج بنفح العود الأزرق إلى سيق
ويساق لموحّد صفوف العرب سوق
اللي جمع شمل العرب عقب تفريق
عن لا يجي فيه انقسامات وفتوق
بالرأي وبتوفيق رب المخاليق
جا للعرب سمعه وهيبه ومنطوق
واللي خسرهم في زمان التفاريق
استرجعوه وكل مطرود ملحوق
يا منقذ الغرقان في حزت الضيق
يا سابق مانتب على الطيب مسبوق
وجهك طليق وصاحبتك التوافيق
بين اليمن والشام ماقفك مرموق
وروس الرجال اللي منوّل مدانيق
خليتها يا بوفهد ترتفع فوق
لك ماقف يعرف إلى نشف الريق
رديت به مدن سليبات وحقوق
راحت واهلها في طلبها مشافيق
وعادت لهلها من هل الغدر والبوق
عادت ولا عادت بخدعة وتلفيق
ولا بلوغ الهرج بلسان وشدوق
عادت بعد سل السيوف اللواهيق
اللي بها يسترجع الحق مطبوق
وشهب لها فوق الشواهيق تحليق
فيها البلا لعيون الاخصام مسحوق
لا صار لرياح الهبايب تصافيق
من دار مخلوق على دار مخلوق
برق الجنوب إلى برق له عشاشيق
تنصاع له ويهزّها لجله الشوق
ورعد الشمال إلى زجر بالصواعيق
للبرق والرعاد عاشق ومعشوق
بقيادة اللي حقق النصر تحقيق
على النقا ماهوب دارق ومدروق
واحلى الكلام اللي له الفعل تصديق
لمحمّدين عنان الامجاد مطلوق
سيفين زادونا شجاعة وتشويق
على سياج المملكة شكلوا طوق
سيف يصد أهداف ضرب المجانيق
وسيف لحفظ الأمن والعهد ماثوق
وراس الهرم من لاذ به لاذ بطويق
لا يلحقه ضدّه ولا يلحقه عوق
- عبد الله بن نايف بن عون