الموضوعات الأكثر
الله اكبر عظيم الملك والشاني
مالك الملك رب العرش سبحانه
باسمه ابدا القصيد ومنطق لساني
وكل رجلٍ يحكمه منطق لسانه
نحمد الله ونشكر كل الاحياني
عايشين بفضل الله وآمانه
الامن راسخٍ في كل الاوطاني
لو حصل ما حصل من بعض سكانه
الله اللي يقدر كل ما كاني
وارتضينا بحكم الله وسلطانه
مملكتنا هدف لاسراب عدواني
والعدا ما لهم ببلادنا خانة
هم نوونا بشرٍ سرب غرباني
وش يضر السما من سرب غربانه
ما ثنى عزمنا ما صار من جاني
حلل القتل والتفجير باخوانه
بشّر اللي بدا فعله بخسراني
خاب ظنه وخابوا معه ورعانه
حيث فعله حرام وفعل شيطاني
عيذ بالله من فعله وشيطانه
يا شعوب الوطن حضرٍ وبدواني
كل منّا يحط اخوه بوزانه
كل منّا يود العلم للثاني
وكل جارٍ يوصّي كل جيرانه
نتعاون ونصبح شمل واخواني
في وجيه العدا واليوم ميدانه
صف واحد مثل ما رص بنياني
المحبة وبذل الروح عنوانه
سور للمملكة بارواح وابداني
مابني من حجر ورخام باركانه
نفدي المملكة شيبٍ وشباني
من قديم وهذا فعل شجعانه
كلنا مرخصين غال الاثماني
عاش من يبذل الارواح لاوطانه
الوطن حبه اوصت فيه الادياني
لا رحم حي من سبه ومن خانه
الوطن والوطن عشقٍ ووجداني
ما بذلنا النفوس الا على شانه
قاله اللي يطوّع زين الالحاني
عارفٍ بالشعر لفظه وميزانه
من تميم العرب خالٍ وعمّاني
وافي بالعهد من عصر جدانه
- فهد بن عبد العزيز الفايز