يا ما حلا مع فجَّة الصبح دلَّة

والنار يسبق ضوها شعّة النور

في مجلسٍ من يدهله ما يملّه

وسوالفٍ بين الرجاجيل بالدور

ان جاب واحد علم ذا منصتٍ لّه

مافيهم اللي يقطع القيل ويثور

صبح المطر باقي على الارض طلّه

ارض خباريها تقل صيفة بحور

وسحبٍ على شبه الجزيره تعلّه

وكلٍ يقول القاع مِخْضِر وممطور

واد الرمة يمشي ومثله بَرَن لّه

وديان يرقا سيلهن كل عثمور

والارض خضرا والنفل فايحٍ لّه

ريحٍ غلب ريحه على جملة عطور

وشفت ام سالم ترفع الصوت كلّه

قامت تهجرس صوتها فوق وحدور

وشفت الزبيدي يا حلو فقعةٍ لّه

زودٍ على طلع السهل شيف بالقور

ارضٍ براحٍ خدها مسمهلّة

تشوف مد الشوف من دون ناظور

ترعى بها حرش العراقيب فَلّة

ماعندها شبكٍ ولاصوت ماطور

مافيه شبكٍ بالمسا يرجعن لّه

يرعن هَيَت حتى الصبي نَزَّل الكور

اليا ارْزِمَن صغارهن ارْزِمَن لّه

حيرانِهن معهن ولا فيه مَقْهور

ومعهن فحلهن لاخذن ينظرن لّه

يتلي عشايرهن.. سنامه تقل طور

شمّخ اذراهن والوبر جا محلّه

وبر جديد وصار نورٍ على نور

وضحٍ كما لون البرد يشبهن لّه

يزهن دباديبٍ على الحلق مديور

الياشرقت شمس الضحى ناطحن لّه

وحدة تطق بخفها لبَّة الزور

ثم وقفن لعيالهن وعطفن لّه

وقادن على مشهاتهن تقل طابور

وتسمّعن صوت المدوّه وجن لّه

لا شاف مرح صغارهن صار مسرور

وصلوا على الهادي على خير ملّة

نبينا اللي سنته خير دستور

حسين بن عبيد الله بن هندي - القصيم - القرين