الوضع خالي من الإحساس
جمال والليل ياطوله
والفكر ولّع لي النبراس
وشو له الصمت وشو له
بكتب من الشعر بالقرطاس
وأطاول النجم وانوله
وابيّح السد والمقياس
من أول الجرح لفلوله
ماعقب هذا الوجع والياس
شيٍ ابخفيه مااقوله
الدار لوبه كثير اوناس
مااشوف انا الدار مأهولة
القلب جذعٍ عليه الفاس
يصول صوله ورى صوله
واللي بقى بي من الانفاس
مرات اطوله ولا اطوله
والجوف ناره لها مقباس
تضرم إذا لاح مجدوله
من عقبه العمر لو به ناس
كل الأحاسيس مقتولة
- جمال الشمري
TOP