الصبر مفتاح الفرج والحقيقة
صبرٍ وراه الياس مرٍ مذاقه
يا الله دخيلك وين ابلقى طريقة
واقفي عن ابواب الشرس والحماقة
اللي طواه الهم يشرق بريقه
لو هو يقدم له من الورد باقة
واللي يقيّل في ظلال الحديقة
ما هوب داري بالبحر واصطفاقه
بس الوكاد ان السلوم العريقة
تحكم على الطيّب بحكم العلاقة
الثانية مربوطةٍ بالدقيقة
والمهتوي ياقف على عظم ساقه
يصارع الدنيا بنظرة عميقة
ولا عليه من العلوم الدقاقة
مع الحجاج الطلق يمنىٍ طليقة
بالماقف المشهود يذري رواقه
علمٍ موثق ما يبي له وثيقة
الناس كل ماشيٍ باشتياقه
واللي زعل من غلطته في حريقة
يرضيه موسٍ مثل موس الحلاقة
ما عندي إلا الصدق نفسي شفيقة
فتحت لي طاقة وقفَلت طاقة
اليوم ما بين الرفيق ورفيقه
يا قل من يعرف حقوق الرفاقة
- صالح الناصر