ردي ترى ما عاد بالصبر تاجيل

ردي قبل لا يكشف الوضع ردي

واكيد طبعاً ما تفيد المراسيل

ولا هو بـ يدك لا ولا هو بـ يدي

يا قوم لو نشرح جميع التفاصيل

صار البحر من غير جزراً ومدي

نخفي مواجعنا من الفجر لليل

وأحلامنا في جرهداً مجرهدي

لكن قرار الوقت ما عنه تحويل

لازم يصير الشخص بالوقت جدي

المزح نوب يوردك للبهاذيل

لو مانت لجروح الزمن مستعدي

احسن طريقه تلزم الصمت بالحيل

ما غير كيف الحال وانت امتعدي

ومن شان تسلم من هل القال والقيل

لا تقول مهما صار لك باح سدي

والخلق ما تعلم بغيب المقابيل

مهما تجيب علوم والا تودي

لا تكشف أسرارك ولا تقبل الميل

خلك كذ طول الزمن في تحدي

تدرين خوذي راحتك لو طفح كيل

ردي متى ما ناسبك وقت ردي

- دحيم النومسي